ਇਹ ਦੋ ਹੱਥ ਦੁਆਵਾਂ ਮੰਗਣ,ਸਭ ਲਈ ਸ਼ੁੱਭ ਦੁਆਵਾਂ ਮੰਗਣ ।
ਰੱਬੀ ਬਰਕਤ ਹਰ ਥਾਂ ਹੋਵੇ,
ਜੱਗ ਲਈ ਸੁੱਖ ਦੀਆਂ ਚਾਹਵਾਂ ਮੰਗਣ ।
ਹਰ ਵਿਹੜੇ ਵਿਚ ਰੌਣਕ ਵੱਸੇ,
ਠੰਡੀਆਂ ਠਾਰ ਹਵਾਵਾਂ ਮੰਗਣ ।
ਕਦੇ ਨਾ ਤਿੜਕਣ ਰਿਸ਼ਤੇ ਸਾਂਝਾਂ,
ਹੱਸਦੇ ਭੈਣ ਭਰਾਵਾਂ ਮੰਗਣ ।
ਲੰਮੀ ਉਮਰ ਹੰਢਾਵੇ ਹਰ ਕੋਈ,
ਵੱਸਦੇ ਪਿੰਡ ਗਿਰਾਂਵਾ ਮੰਗਣ ।
ਗੋਦੀ ਦਾ ਨਿੱਘ ਹਰ ਕੋਈ ਮਾਣੇ,
ਮਮਤਾ ਭਿੱਜੀਆਂ ਮਾਂਵਾਂ ਮੰਗਣ ।
ਰਿਸ਼ਤੇ ਨਾਤੇ ਪਿਆਰ ਮੁਹੱਬਤ ,
ਵਿਚ ਗਲਵੱਕੜੀ ਬਾਹਵਾਂ ਮੰਗਣ ।
ਬੋਹੜਾਂ ਪਿੱਪਲ ਪਿੰਡ ਦੀਆਂ ਸੱਥਾਂ ,
ਬੈਠਣ ਲਈ ਸਭ ਥਾਂਵਾਂ ਮੰਗਣ ।
ਧਰਤੀ ਤੇ ਹਰਿਆਵਲ ਹੋਵੇ ,
ਪਗਡੰਡੀਆਂ ਤੇ ਰਾਹਵਾਂ ਮੰਗਣ ।
ਪ੍ਰਭਾਤਾਂ ਦੀ ਲਾਲੀ ਮੰਗਣ ,
ਰਿਸ਼ਮਾਂ ਦਾ ਸਿਰਨਾਵਾਂ ਮੰਗਣ ।
ਰੱਬ ਦੀ ਯਾਦ ਮਨੋਂ ਨਾ ਵਿਸਰੇ ,
ਦੋਵੇਂ ਹੱਥ ਦੁਆਵਾਂ ਮੰਗਣ ।
ਕੰਮ ਕਰੋ ਤੇ ਵੰਡ ਕੇ ਖਾਵੋ ,
ਰੱਬ ਤੋਂ ਨੇਕ ਸਲਾਹਵਾਂ ਮੰਗਣ ।
ਪੀਰ ਫਕੀਰ ਤਾਂ ਸਾਂਝੇ ਸਭ ਦੇ ,
ਸਭਨਾਂ ਲਈ ਦੁਆਵਾਂ ਮੰਗਣ ।
****
No comments:
Post a Comment